केंद्रीय रेल्वेमंत्री अश्विनी वैष्णव यांनी आगामी सणासुदीच्या काळात रेल्वेच्या तयारीची माहिती दिली. तसेच, महाराष्ट्रातील विविध प्रलंबित आणि सुरू असलेल्या प्रकल्पांवरही त्यांनी प्रकाश टाकला. नाशिक दौऱ्यावर असताना त्यांनी पुणे-नाशिक रेल्वे प्रकल्पाच्या सद्यस्थितीबद्दल महत्त्वाची माहिती दिली.
सणासुदीसाठी विक्रमी विशेष रेल्वे गाड्या
दिवाळी आणि छठ पूजेनिमित्त प्रवाशांची प्रचंड गर्दी लक्षात घेता, भारतीय रेल्वे यावर्षी विक्रमी संख्येने विशेष गाड्या चालवणार आहे. रेल्वेमंत्री अश्विनी वैष्णव यांनी घोषणा केली की, “मागील वर्षी आम्ही ७,५०० विशेष गाड्या चालवल्या होत्या, मात्र यावर्षी आमची क्षमता वाढली असून आम्ही १२,००० विशेष गाड्या चालवण्याचे लक्ष्य ठेवले आहे.” यापैकी जवळपास १०,००० गाड्यांची अधिसूचना आधीच जारी करण्यात आली आहे. ऐनवेळची गर्दी हाताळण्यासाठी १५० पूर्णपणे अनारक्षित गाड्याही तयार ठेवण्यात येणार आहेत. या विशेष गाड्या १ ऑक्टोबर ते १५ नोव्हेंबर या कालावधीत धावतील.
वंदे भारत स्लीपर आणि वक्तशीरपणावर भर
रेल्वेच्या सुधारित कामगिरीवर बोलताना वैष्णव यांनी सांगितले की, देशभरातील ७० पैकी २९ विभागांमध्ये गाड्यांचा वक्तशीरपणा ९०% पेक्षा जास्त झाला आहे, जी एक मोठी सुधारणा आहे. याचबरोबर, बहुप्रतिक्षित ‘वंदे भारत स्लीपर’ ट्रेनची चाचणी यशस्वी झाली असून ती लवकरच सेवेत दाखल होण्यास सज्ज आहे. “आम्ही एकाच वेळी दोन रेकसह सुरुवात करणार आहोत. पहिला रेक तयार आहे आणि दुसरा १५ ऑक्टोबरपर्यंत दाखल होईल,” असेही त्यांनी स्पष्ट केले.
महाराष्ट्रातील प्रकल्पांना वाढीव निधी
अश्विनी वैष्णव यांनी सांगितले की, महाराष्ट्रातील रेल्वे प्रकल्पांना केंद्र सरकारकडून विशेष प्राधान्य दिले जात आहे. ते म्हणाले, “पूर्वीच्या सरकारच्या काळात महाराष्ट्राला रेल्वे कामांसाठी वर्षाला केवळ ११०० कोटी रुपये मिळायचे. आता पंतप्रधान नरेंद्र मोदी यांनी राज्यासाठी १६ हजार कोटी रुपयांचा निधी मंजूर केला आहे.” ‘नमो भारत रॅपिड’ या नवीन प्रादेशिक ट्रेन संकल्पनेअंतर्गत महाराष्ट्रात मोठ्या प्रमाणावर नवीन रेल्वे ट्रॅकची कामे सुरू आहेत.
महाराष्ट्रातील रेल्वे स्थानकांचा पुनर्विकास
देशभरात एकूण १३३७ रेल्वे स्थानकांच्या पुनर्विकासाचे काम हाती घेण्यात आले असून, त्यापैकी सर्वाधिक कामे महाराष्ट्रात होत आहेत. मुंबई CSMT, अजनी (नागपूर), छत्रपती संभाजी नगर, अहमदनगर, हडपसर, सोलापूर, हातकणंगले आणि लासलगाव यांसारख्या अनेक महत्त्वाच्या स्थानकांचे डिझाइन तयार झाले असून, काही ठिकाणी कामाला सुरुवातही झाली आहे.
पुणे-नाशिक रेल्वे प्रकल्पाची सद्यस्थिती
नाशिक आणि पुणे या दोन महत्त्वाच्या औद्योगिक आणि कृषी केंद्रांना रेल्वेने जोडणारा प्रकल्प अनेक वर्षांपासून चर्चेत आहे. या प्रकल्पाच्या दिरंगाईवर बोलताना वैष्णव म्हणाले, “नाशिक-पुणे रेल्वे प्रकल्प मंजूर झाला आहे, परंतु तो पुढे नेण्यात एक तांत्रिक अडचण निर्माण झाली आहे. ही अडचण दूर करण्याचे काम वेगाने सुरू असून, ती सुटल्यानंतर प्रकल्पाच्या कामाला निश्चितपणे गती येईल.”
पुण्याचा विकास आणि नवीन कनेक्टिव्हिटी
पुणे शहराचा झपाट्याने विकास होत असून देशभरातून लोक येथे येत आहेत. यामुळे रेल्वेवरील ताण वाढला आहे. ही गरज ओळखून पुण्यात चार मोठे रेल्वे टर्मिनल बनवण्याचा निर्णय घेण्यात आला आहे. यामुळे पुण्याची रेल्वे हाताळणीची क्षमता मोठ्या प्रमाणात वाढेल. याशिवाय, नाशिक-शिर्डीमार्गे दक्षिण भारतात जाण्यासाठी एक नवीन मार्ग तयार करण्याची योजना विचाराधीन आहे. नाशिक रोड रेल्वे स्थानकाचाही पुनर्विकास केला जाणार असून, त्याचे डिझाइन कसे असावे यासाठी त्यांनी नाशिककरांकडून सूचना मागवल्या आहेत.
